Ofbeldi getur haft verulegar afleiðingar á heilsufar þolandans, bæði líkamlegt og sálrænt. Skömm og sektarkennd eru algengar tilfinningar. Þær geta hindrað þolendur í því að leita sér aðstoðar eða átta sig á umfangi vandans. Hversu mikil áhrifin verða, fer eftir:
- Alvarleika, því alvarlegra sem ofbeldið er, þeim mun meiri áhrif hefur það á líkamlega og sálræna heilsu.
- Tíðni og tíma, því oftar og því lengur sem ofbeldið varir þeim mun meiri áhrif hefur það á heilsuna.
- Áhrif ofbeldisins vara í langan tíma eftir að ofbeldið hættir.
Því er mikilvægt að sporna við öllu ofbeldi sem fyrst og leita hjálpar.
Áhrif á líkamlega heilsu:
Líkurnar á ýmsum langvinnum líkamlegum heilsuvanda aukast. Þar má til dæmis nefna:
- Höfuðverkjaköst
- Bakverkir og aðrir stoðkerfisverkir
- Bólgusjúkdómar
- Brjóstverkur
- Kvensjúkdómar
- Kynsjúkdómar
- Meltingarfæratruflanir
- Þvagfærasýking
- Lungnabólga
Auk þessa geta þolendur þurft að glíma við áverka vegna líkamlegs ofbeldis.
Áhrif á sálræna heilsu:
Þolendur ofbeldis eru fjórum sinnum líklegri til glíma við geðröskun en þeir sem ekki hafa orðið fyrir ofbeldi. Helstu sálrænu afleiðingarnar ofbeldis eru:
- Kvíðaraskanir
- Þunglyndi
- Samskiptaerfiðleikar í fjölskyldu og samfélagi
- Fíkn
- Átraskanir
- Mikil þreyta og orkuleysi
- Áfallastreituröskun
- Svefntruflanir
- Sjálfsvígstilraunir
- Léleg sjálfsmynd
- Snertifælni
Áhrif á meðgöngu:
Ofbeldi á meðgöngu getur aukið tíðni margra meðgöngukvilla. Það getur meðal annars haft áhrif á:
- Hækkaðan blóðþrýsting
- Bjúg
- Blæðingar
- Ógleði
- Uppköst
- Þvagfærasýkingar
- Fyrirburafæðingar
- Léttburafæðingar
- Fæðingar barna sem þurfa gjörgæslu.
Alvarlegri afleiðingar eins og fósturskaði, fósturlát og andvana fædd börn hafa einnig verið tengd ofbeldi.
Fæðingarþunglyndi er 2-3 sinnum algengara hjá konum sem hafa orðið fyrir ofbeldi á meðgöngu.
Fötlun og/eða örorka:
Ofbeldi getur valdið fötlun og/eða skertri starfsgetu. En einnig er fatlað fólk og þá sértaklega fólk með þroskaskerðingu í aukinni áhættu á að verða fyrir ofbeldi. Komið hefur fram í Bandarískri rannsókn að hjá þolendum ofbeldis, sé meira en helmingurinn fatlaðir og/eða öryrkjar. Þar var örorkan m.a. vegna hjarta- og æðasjúkdóma, langvinnra verkja, taugaskemmda, lungnasjúkdóma og þunglyndis.