Hitakrampi hjá börnum

Kaflar
Flokkur
Útgáfudagur

Hitakrampi (e. heat cramps) geta komið í kjölfar sótthita hjá börnum. Stuttir hitakrampar eru yfirleitt hættulausir og valda barninu ekki skaða. Það er óhuggulegt að sjá hitakrampa í fyrsta skipti og alltaf skal þá leita til læknis og/eða hringja á sjúkrabíl. Einnig skal leita læknis þegar krampi stendur yfir í meira en fimm mínútur eða ef endurteknir krampar eiga sér stað.

Einkenni

  • Hitakrampar eru algengastir þegar hiti hækkar hratt í upphafi veikinda.
  • Oft byrjar hitakrampinn á kokhljóði sem verður vegna samdráttar í vöðvum.
  • Skyndileg skerðing á meðvitund.
  • Augu renna upp á við.
  • Barnið stífnar upp og/eða taktfastir kippir fara um líkamann.
  • Öndun verður grunn og óregluleg.
  • Blámi eða fölvi á vörum og kringum munninn.
  • Flestir hitakrampar standa í hálfa til þrjár mínútur en geta staðið lengur.
  • Sótthiti yfir 38˚C eftir krampa.
  • Börn verða oftast mjög þreytt eftir að krampa lýkur og sofna oftast, en svara áreiti.

Algengi

Um 5% barna fá hitakrampa a.m.k. einu sinni. Yfirleitt eru þetta börn á aldrinum 1-3 ára. Eftir fyrsta hitakrampa eru 30% líkur á endurtekningu

Orsök

Orsök hitakrampa er sótthiti, oftast af völdum umgangspesta. Ekki er vitað af hverju sum börn fá hitakrampa en önnur ekki. Hitakrampi hjá heilbrigðu barni hefur ekki áhrif á þroska.

Hvað get ég gert?

  • Vera róleg, barnið er ekki í lífshættu.
  • Taka tímann, hversu lengi varir krampinn?
  • Leggja barnið niður og á hliðina, þar sem það meiðir sig ekki á neinu. Einnig til að hugsanleg uppköst og munnvatn renni út úr munni þess en ekki ofan í kok.
  • Fylgjast með framvindu krampans, þ.e. hvar er barnið stíft, hvar eru kippir, hvernig eru augu og litarháttur barns. Tala rólega til barnsins meðan krampinn stendur yfir.
  • Þegar krampinn hættir, reynið að lækka hita hjá barninu og láta því líða vel t.d. með því að hafa það einungis á nærfötum og gefa því hitalækkandi lyf.

Í neyðartilfellum

Hringja á sjúkrabíl, 112 ef:

  • Þú ert óörugg/ur.
  • Hitakrampinn varir ennþá eftir fimm mínútur.
  • Annar krampi byrjar fljótlega eftir að sá fyrsti hættir.
  • Barnið er ekki með fulla meðvitund fyrir krampann eða einni klukkustund eftir krampa.
  • Þig grunar að sótthitinn hjá barninu geti verið vegna alvarlegra veikinda, t.d. ef þig grunar að barnið sé með alvarlega sýkingu eins og heilahimnubólgu.
Var þetta efni hjálplegt?
Markmið vefsins er að veita upplýsingar um öll mál er varða heilsu. Allar ábendingar til að bæta vefinn eru vel þegnar.