Margir tengja grannt eða vöðvastælt útlit við árangur en varast skyldi að leggja þetta að jöfnu. Margt íþróttafólk finnur fyrir pressu til að vera í ákveðinni líkamsþyngd eða uppfylla ákveðnar útlitskröfur. Neikvæð líkamsímynd getur ýtt undir hegðun sem setur heilsu og farsælan feril í hættu. Skyndilegt þyngdartap íþróttamanns getur bætt árangur í stuttan tíma. Áhættan sem fylgir því getur reynst dýrkeypt meðal annars með auknum líkum á meiðslum, ofþjálfun, óeðlilegri matarhegðun og tapi á styrk.
Agi, staðfesta, metnaður og skipulagshæfni eru mikilvægir eiginleikar þegar kemur að því að ná árangri í íþróttum. Þegar kröfur um útlit og líkamsvöxt bætast við árangurstengd markmið í íþróttum er sú hætta fyrir hendi að metnaðurinn fari fram úr hófi. Staðalímyndir og hugmyndir um að tiltekinn líkamsvöxtur sé vænlegastur til árangurs geta aukið líkur á að einstaklingurinn þrói með sér átraskanir eða óheilbrigt samband við mat.
Miklar sveiflur í líkamsþyngd eru óæskilegar með tilliti til heilsu og árangurs. Líkamsbygging ætti í öllum tilfellum að styðja við heilsu íþróttafólks allt árið um kring. Auk árangurs í íþróttum ætti það að vera markmið þeirra sem koma að þjálfun íþróttafólks að stuðla að heilbrigðri líkamsímynd og almennri vellíðan. Hegðun hefur mest áhrif á lífsgæði og líðan að erfðum undanskildum. Hér getur þú tekið prófið, séð hver staðan er og hvernig þú getur bætt þig.
Hegðun hefur mest áhrif á lífsgæði og líðan að erfðum undanskildum. Sjáðu hvernig staðan er hjá þér.
