Ungbarnablanda

Ungbarnablanda er ýmist keypt tilbúin eða gerð heima úr þurrmjólkurdufti sérstaklega ætluð ungbörnum. Blöndurnar eru mismunandi fyrir ólíkan aldur og því þarf að lesa vel utan á umbúðir. Ef notað er þurrmjólkurduft skiptir miklu máli að fylgja leiðbeiningum á umbúðum nákvæmlega. Of sterk eða of veik blanda getur skaðað barnið. Það þarf að nota réttar mæliskeiðar og þær eiga að vera sléttfullar. Mæla á nákvæmlega magn af dufti og vatni í samræmi við leiðbeiningar á pakka og útbúa aðeins eina máltíð í einu.

+ - Blöndun þurrmjólkur

Kalt vatn úr krananum er notað til blöndunar á þurrmjólk. Ávallt skal nota soðið vatn fyrir hverja blöndu (>70°C) eða vatn sem búið er að sjóða og kæla, en þá er mikilvægt að það hafi ekki mengast.

Hellið réttu magni af soðnu vatni í pelann, sléttfyllið jafnmargar skeiðar og hæfir vatnsmagninu í pelanum. Hristið pelann vel og athugið hitastig. Það er mjög mikilvægt að blanda rétt og nota mæliskeiðarnar sem fylgja dósinni.

Gætið fyllsta hreinlætis við blöndun til að koma í veg fyrir mengun. Handþvottur er mikilvægur. Gætið þess að mæliskeiðin sé hrein. 

+ - Hitastig ungbarnablöndu

Ungbarnablanda þarf að vera ylvolg við gjöf og er mikilvægt að láta fáeina dropa af mjólk á handlegginn til að kanna hvort hitastigið sé hæfilegt.

Best er að hita ungbarnablöndu í volgu vatnsbaði. Ef hún er hituð í örbylgjuofni þá hitnar mjólkin meira en pelinn sem getur verið varasamt. Einnig skemmast mikilvæg næringarefni í mjólkinni ef hún er ofhituð á þennan hátt. 

Sýna þarf varkárni, hrista pelann og prófa hitastigið áður en barnið fær að totta pelann.

+ - Geymsla ungbarnablöndu

Best er að blanda þurrmjólk jafnóðum fyrir hverja máltíð til að tryggja ferskleika, sérstaklega þegar barnið er mjög ungt. Mæla á nákvæmlega magn af dufti og vatni í samræmi við leiðbeiningar á pakka og útbúa aðeins eina máltíð í einu. 

Mjólkurleifar sem hafa staðið lengi við stofuhita á alls ekki að gefa barninu. Eftir 1-2 klst í stofuhita myndast kjöraðstæður fyrir bakteríur til að fjölga sér. Ef barnið klárar ekki úr pelanum á að henda afganginum.  

Þessi grein var skrifuð þann 04. maí 2017

Síðast uppfært 21. maí 2021