Svimi er þegar einstaklingur upplifir falska skynjun á hreyfingu. Svimi lýsir sér stundum eins að umhverfið snúist, það sé erfitt að halda jafnvægi eða yfirliðstilfinning. Oftast gengur þetta ástand hratt yfir og er sjaldnast hættulegt, en getur verið óþægilegt.
Orsakir
Orsök svima getur verið margskonar t.d.
- Aukaverkun af lyfjum
- Einkenni frá innra eyra t.d. steinaflakk í eyra, sýking og/eða vökvasöfnun
- Hjarta- og æðasjúkdómar
- Járnskortur
- Kvíði
- Lágur blóðsykur
- Lágur blóðþrýstingur
- Mígreni
- Taugasjúkdómar
- Vöðvabólga í hálsi og herðum
- Vökvaskortur
Einkenni
Svimi er algengt einkenni meðal fólks en upplifun svima getur verið mismunandi eftir orsökum hans.
Umhverfið er á hreyfingu
Orsök: T.d. steinaflakk í eyra (e. vertigo), mikill vökvi eða sýking í innra eyra
Sundl (Yfirliðstilfinning)
Orsök: T.d. lágþrýstingur, vökva- og/eða blóðsykurskortur
Óstöðugleiki
Orsök: T.d. aukaverkun af lyfjum
Höfuðþyngsli
Orsök: T.d. vöðvaspenna eða mígreni
- Svimi getur einnig verið einkenni taugasjúkdóma
- Ef þú hefur önnur einkenni geta þau gefið til kynna orsök svima
- Svimi getur horfið þegar önnur einkenni eru meðhöndluð t.d. mígreni eða lágþrýstingur
Hvað get ég gert?
Yfirleitt nær líkaminn að laga svima en hætta er á yfirliði ef fólk bregst ekki við. Gott er að:
- Beygja höfuð niður setjast eða leggjast niður ef svimi er mikill
- Rólegar hreyfingar, standa varlega upp
- Hvílast
- Drekka vökva
- Forðast kaffi og áfengi
Hvenær skal leita aðstoðar?
- Þú hefur áhyggjur
- Heyrnarskerðing fylgir í kjölfarið
- Máttminnkun er í andliti eða limum
- Mikill höfuðverkur kemur í kjölfarið
- Sjónskerðing fylgir í kjölfarið
- Svimi fer ekki eða er endurtekinn
- Þú varðst fyrir höfuðáverka
Finna næstu heilsugæslustöð og bráðamóttöku.