Börn og tannlæknar

Tannlækningar barna eru gjaldfrjálsar. Þessi réttur nær fram að 18 ára afmælisdegi hvers og eins. Aðeins þarf að greiða 2500 króna komugjald á ári. Til þess að fá tannlækningar barna fríar þarf að hafa skráðan heimilistannlækni. Þú getur skráð heimilistannlækni á réttindagátt Sjúkratrygginga Íslands en tannlæknirinn þinn getur einnig skráð heimilistannlækni fyrir þig. Hér er að finna lista yfir alla tannlækna sem hafa samið við Sjúkratryggingar um gjaldfrjálsar tannlækningar barna. Gott er að skrá heimilistannlækni fyrir barnið þegar það nær eins árs aldri.

Reglubundið eftirlit hjá tannlækni

Það er einstaklingsbundið hversu oft börn þurfa að fara í eftirlit hjá tannlækni. Heimilistannlæknir hefur meðal annars það hlutverk að boða börn í eftirlit og meta hversu oft þau þurfa að koma. Það ættu aldrei að líða meira en tvö ár á milli heimsókna til tannlæknis.

Hvenær á að fara í fyrstu heimsókn til tannlæknis?

Öll börn ættu að vera búin að heimsækja tannlækninn áður en þau verða fjögurra ára. Miklu skiptir fyrir framhaldið að fyrsta heimsókn til tannlæknis sé ánægjuleg upplifun fyrir barnið.

Margir fullorðnir kvíða því að fara til tannlæknis. Í því tilviki getur foreldri auðveldlega smitað barn sitt af þessum kvíða ef ekki er hugað að þeim þætti. Það er til dæmis ekki góð hugmynd að fá barn ofan af því að borða sælgæti með því að hræða það með því að tannlæknirinn þurfi þá að bora í tennurnar. Miklu nær er að nota þau rök að nammið skemmi tennurnar eða hafa sælgætið einfaldlega ekki í boði. Það er óþarfi að lofa börnum verðlaunum ef vel gengur því það er engin ástæða til að ætla annað en að vel gangi. Heimsókn til tannlæknis er fyrir flest börn ánægjuleg upplifun og sum vilja fara oftar en þeim stendur til boða.

Þessi grein var skrifuð þann 16. nóvember 2016

Síðast uppfært 20. júlí 2017