Sjálfsmat vísar til þeirrar grundvallarskoðunar sem við höfum á okkur sjálfum og hvers virði við erum sem manneskjur.
Manneskja með lágt sjálfsmat hefur almennt neikvætt álit á sjálfri sér. Telur sig ekki hafa marga góða eiginleika, finnst hún ekki hafa mikið fram að færa eða falla öðrum vel í geð. Neikvætt sjálfsmat tengist svokölluðum neikvæðum kjarnahugmyndum. Fólk trúir því innst inni að það sé verra en aðrir, sé t.d. heimskara, ljótara eða leiðinlegra og minna virði en annað fólk.
Það gefur auga leið að vellíðan og lífsánægja skerðast verulega við að burðast með slík viðhorf í farteskinu. Því er mikilvægt að leita leiða til að efla heilbrigt sjálfsmat og leita eftir faglegri aðstoð ef vandinn er mikill eða langvarandi.
Það að hafa jákvætt sjálfsmat er ekki það sama og að vera sjálfumglaður eða sjálfselskur. Fólk með heilbrigt sjálfsmat hefur almennt jákvætt viðhorf til sjálfs síns og lítur á sig sem jafningja annarra. Það þekkir eigin styrkleika og metur jákvæða eiginleika sína en er jafnframt meðvitað um að það hafi einhverja galla. Það veit að allir hafa einhverja veikleika og gerir ekki þá kröfu til sjálfs síns að vera fullkomið. Almennt er fólk sátt við sjálft sig og sýnir sjálfu sér sanngirni og velvild. Fólki finnst það jafn mikils virði og aðrir, hvorki meira né minna.
Upplýsingar um sjálfsmynd.
Hegðun hefur mest áhrif á lífsgæði og líðan að erfðum undanskildum. Sjáðu hvernig staðan er hjá þér.
