Ófrjósemisaðgerð er nokkuð sem margir velta fyrir sér þegar þeir hafa tekið þá ákvörðun að eignast ekki börn í framtíðinni.
Aðgerðina mega einungis læknar sem hafa sérfræðiviðurkenningu í almennum skurðlækningum, kvensjúkdómalækningum og þvagfæraskurðlækningum framkvæma.
Heimilt er að framkvæma ófrjósemisaðgerð að ósk einstaklings sem náð hefur 18 ára aldri.
Aðgerðin felst í því að sáðrás karla og eggjaleiðurum kvenna er lokað þannig að sáðfrumur fari ekki í sæðið og eggin ekki niður í legið. Sem getnaðarvörn er ófrjósemisaðgerð nánast 100% örugg. Aðgerðin er varanleg.
Frá árinu 2000 hefur mikil breyting orðið á tíðni ófrjósemisaðgerða hér á landi. Konum hefur fækkað sem fara í slíka aðgerð á meðan körlum fjölgar. Í parasambandi er mikilvægt að báðir aðilar koma að ákvörðun um ófrjósemisaðgerð.