Ert þú að velta fyrir þér að hætta að nota tóbak en ert ekki viss hvort þig langi til þess?
Það er eðlilegt að spyrja sig: Er þetta rétti tíminn til að hætta? Það getur verið snúið að finna nákvæmlega rétta tímann en kannski er þessi tími ekki verri en hver annar til að taka skref í átt að tóbaksleysi.
Grundvallaratriðið hlýtur að vera að þig langi að verða tóbakslaus. Þú þarft að taka ákvörðun um það. Það eitt að taka ákvörðun og vinna markviss eftir ákveðnu plani er hvatning út af fyrir sig.
Heilsugæsla höfuðborgarsvæðisins veitir ókeypis ráðgjöf fyrir þá sem vilja hætta að nota nikótín og/eða tóbak. Ráðgjöfin getur verið símaráðgjöf eða skrifleg með tölvupósti.
Hægt er að óska eftir ráðgjöf á netspjallinu hér á síðunni eða hringja í síma 513-1700. Biðtími er um 2-3 virkir dagar.
Hvers vegna vil ég hætta?
Fyrsta skrefið til að styrkja löngunina til þess að hætta, er að hugsa vandlega um hvers vegna þú vilt hætta að nota tóbak. Spurningar eins og:
- Hvað græði ég á því?
- Hvaða gleði fylgir því?
- Hvað losna ég við með því?
- Er eitthvað að óttast við tóbakslaust líf?
Það er fyrirhafnarinnar virði að reyna að finna eins margar góðar ástæður og hægt er fyrir því að hætta. Ef þú stendur þig að því að eftir nokkurt hlé á tóbaksnotkun, að finna þér afsakanir fyrir því að fá þér smá tóbak aftur. Þá er gott ef þú hefur velt málinu vandlega fyrir þér og veist hvað þú vilt.
Þegar söknuðurinn eftir tóbakinu kemur er léttara að minnast kostanna heldur en að muna af hverju þú vildir hætta. Þess vegna er mikilvægt að þú finnir þínar eigin ástæður og skrifi þær á blað eða í tölvu og gætir þeirra vel.
Gott er að skrifa hjá sér sínar eigin ástæður fyrir að vilja verða tóbakslaus.
Setjast niður í ró og næði, hugsa sig vel um og skrifa hjá sér 10 ástæðurnar fyrir að vilja hætta. Reyna að gera það eins nákvæmlega og hægt er. Láta ekki nægja að skrifa að þú viljir hætta vegna heilsunnar ef hin raunverulega ástæða er sú að þú óskir þess að bæta líkamsþrekið eða losna við áhyggjurnar af að missa heilsuna eða fá krabbamein.
Um nikótínþörf
Hættir þú að nota tóbak muntu eiga eftir að finna til nikótínþarfar. Það getur gerst fyrstu dagana eftir að reykingunum eða tóbaksnotkun í vör/nef er hætt en líka síðar. Besta ráðið til að vera viðbúinn þessu er að fara nákvæmlega yfir það í huganum hvernig maður ætlar að bregðast við þegar þörfin brýst fram.
Það hjálpar líka að vita að tóbaksþörfin stendur sjaldan lengur en í 2-4 mínútur og að stórlega dregur úr þessum köstum strax fyrstu 2 vikurnar eftir að tóbaksnotkun er hætt. Hafðu varann á því nikótínfíknin skýtur upp kollinum annað slagið fyrst um sinn, oft einmitt á stöðum og stundum þar sem tóbak var notað áður.
Hegðun hefur mest áhrif á lífsgæði og líðan, að erfðum undanskildum. Hvernig er staðan hjá þér?
