Öll verðum við reið einhvern tíma, en við verðum að skoða hvernig við tökumst á við reiðina. Einfaldar leiðir til að hemja reiði geta verið að telja upp að tíu eða yfirgefa aðstæðurnar. Gott er að kenna börnum að þekkja einkenni þess að þau séu í þann veginn að verða reið, t.d. að börnin byrja að hitna, finna hraðari hjartslátt, ná ekki að slaka á eða fara að kreppa saman hnefana. Ef börn ná tökum á að stoppa sig af geta þau frekar hugsað málið áður en þau bregðast við. Börn eru ólík og misjöfn og sum eiga auðvelt með að hemja sig á meðan önnur eru hamslausari.
Það getur komið fyrir að foreldrar upplifi vanmátt gagnvart barni sínu sem sýnir endurtekið erfiða hegðun. Ef foreldri líður þannig að það ráði alls ekki við aðstæður er gott að geta gengið út úr aðstæðunum og beðið hitt foreldrið eða ættingja eða náin vin að vera með barninu um stund. Gefa börnum tíma til að jafna sig þegar reiði kemur fram en einnig getur hreyfing hjálpað börnum við að hemja reiði.
Ef aðstæðurnar skapast endurtekið og foreldri/forráðamaður hefur jafnvel áhyggjur af að það gæti beitt barn sitt ofbeldi er ástæða til að leita aðstoðar hjá heilsugæslu eða félagsþjónustu í sinni heimabyggð. Börn eru mis krefjandi og það sýnir styrk að leita sér aðstoðar þegar á þarf að halda.
Góð samskipti eru mikilvæg til að koma í veg fyrir ágreining.