Hreyfing er öllum mikilvæg sama á hvaða aldri fólk er. Flestum er í mun að viðhalda styrk og jafnvægi á efri árum og til þess er gott að gera reglulega æfingar sem auka styrk og liðleika.
Hér er að finna liðkandi og styrkjandi æfingar sem auðvelt er að gera þó hreyfifæri sé ef til vill skert.
Æfingarnar eru gerðar sitjandi á stól og henta flestum vel. Gott er að hafa viskustykki við höndina því það er notað í sumum æfingunum. Æfingin er útskýrð og tilgreint hversu oft er ráðlagt að gera viðkomandi æfingu.
Stólaleikfimi
Gripstyrkur
Með aldrinum rýrna vöðvar líkamans. Hægt er að hægja á þeirri þróun með því að styrkja markvisst vöðvana. Hendurnar eru ekki undantekning á þessu. Hér er að finna æfingar sem allir geta gert heima til að viðhalda og auka styrk í höndum.
Gott er að byrja rólega og hvíla á milli æfinga. Æfingarnar má gera allar í einu eða dreifa þeim yfir daginn eftir því hvað hentar. Með því að koma sér upp þeirri venju að gera reglulega æfingar sem efla gripstyrkinn getur fólk lengur notið þess að hafa gott grip og styrk í höndum til að sinna daglegum störfum og áhugamálum. Í myndböndunum hér má sjá nokkrar góðar æfingar til að viðhalda og efla gripstyrk. Þessar æfingar má gera hvar sem er og jafnvel nýta tímann á meðan horft er á sjónvarp til að efla gripstyrkinn.