Fyrir samfarir-gott að vita

Að tala um kynlíf þarf ekki að vera vandræðalegt. Ef þér finnst það vandræðalegt þá eru hér leiðir sem þú getur farið. Að ræða hluti eins og getnaðarvarnir, kynsjúkdóma eða hvað þér líkar og hvað ekki er góð leið til að deila hugmyndum og væntingum ykkar til kynlífsins. Það getur hjálpað ykkur að taka sameiginlega ákvörðun um það sem hentar báðum.

Hér er athyglinni beint að þeim sem eru að tala við nýjan maka. Fyrir þá sem eru í langtíma sambandi þar sem kynlíf er þegar hluti af sambandinu bendum við á kaflann „Tölum um kynlíf“.

Hvenær?

Veldu stað og stund þar sem þið getið talað saman án þess að verða trufluð. Ekki bíða með að tala um kynlíf þar til þið eruð um það bil að gera það. Þá gætir þú lent í því að taka ákvarðanir í flýti sem þú gætir séð eftir.

Öruggt kynlíf þarfnast undirbúnings og því er mikilvægt að þið ræðið hvaða getnaðarvarnir þið ætlið að nota og hvernig þið ætlið að koma í veg fyrir kynsjúkdómasmit. 

Hvernig?

Til að hefja samtal um kynlíf gætir þú notað eitthvað af þessum setningum.

  • Viltu gera það með mér?
  • Mig langar að fara alla leið mér þér. Hefur þú spáð í það?
  • Við ættum að ræða um öruggt kynlíf ef við ætlum að hafa samfarir.
  • Ættum við að fara í kynsjúkdómapróf áður en við höfum samfarir?
  • Langar til að hafa samfarir við mig?

Að ræða öruggt kynlíf er mikilvægt, hvort sem um er að ræða mök tveggja kvenna, tveggja karla eða karls og konu. Kynsjúkdómar geta smitast á milli í öllum tilvikum. Þú þarft að finna út hvort þú ert í hættu að smitast af kynsjúkdómi. Þú gætir sagt:

  • Áður en við höfum samfarir er svolítið sem ég þarf að spyrja þig um. Hefur þú farið í kynsjúkdómapróf? Hefur þú fengið kynsjúkdóm sem þú veist um?

Svo gæti líka verið að þú þyrfti að segja frá einhverju. Þú gætir byrjað svona:

  • Áður en við höfum samfarir er svolítið sem ég þarf að segja þér.
  • Getum við talað um svolítið áður en við höfum samfarir?

Einlægt samtal áður en til kynmaka kemur eykur líkurnar á að upplifunin verði góð.

Getnaðarvarnir

Ef þú ætlar að koma í veg fyrir þungun þarf að ræða getnaðarvarnir

Þið getið farið saman á heilsugæsluna og fengið ráðgjöf um getnaðarvarnir hjá heimilislækni eða farið til kvensjúkdómalæknis. Læknar geta líka gert kynsjúkdómapróf hjá ykkur.

Skyndikynni

Ef þú telur að þú getir haft samfarir við einhvern sem þú þekkir ekki og varst að kynnast hafðu smokka á þér. Hafðu ekki samfarir við einhvern sem þú þekkir ekki nema smokkur sé notaður.

Nefndu það að þú viljir að smokkur sé notaður áður en kynfærin snertast. Það þarf bara eina snertingu til að smitast af kynsjúkdómi. Ef notuð eru einhver hjálpartæki þarf að gæta þess að þau séu hrein. Lestu um örugga notkun þeirra.

Hugsaðu það fyrirfram hvenær þú ætlar að tala um smokkanotkunina. Það er ágætt að ákveða einhverja línu sem þú ferð ekki yfir nema ræða notkun á smokki. Gæti til dæmis verið: Ég ræði smokkinn áður en ég fer úr fötum eða áður en rennilásinn á buxunum fer niður.

Til þess að undirbúa þig fyrir samtal um smokkanotkun skaltu lesa um smokkinn.

Þessi grein var skrifuð þann 06. júní 2017

Síðast uppfært 09. ágúst 2017